“Репродуктивті денсаулық апталығы” аясында Жетісай ауданы бойынша түсіндірме және ақпараттық-насихат жұмыстары белсенді жүргізілуде. Бұл бастама жасөспірімдердің өз денсаулығына жауапкершілікпен қарауына, ерте жүктіліктің, жыныстық жолмен таралатын аурулардың алдын алуға бағытталған.
Жетісай аудандық орталық ауруханасына қарасты психологтар мен әлеуметтік қызметкерлердің ұйымдастыруымен Ғ.Мұратбаев атындағы Жетісай гумманитарлық- техникалық колледжінде кең ауқымды, мазмұнды форум өтті. Іс-шара аутоагрессияның алдын алу, ерте жүктіліктің алдын алу, ата-аналар мен балалар арасындағы байланыс, отбасылық құндылықтар, сондай-ақ мектептің ішкі тәртіп ережелерін сақтау тақырыптарын қамтыды.
Форумға колледж студенттері мен медицина қызметкерлері қатысып, қазіргі қоғамдағы өзекті мәселелерге байланысты пікір алмасты. Ата-ананың бала тәрбиесіндегі рөлі, отбасылық қарым-қатынас мәдениеті, ересек өмірге дайындық, жасөспірімдердің психологиялық саулығы секілді бағыттар бойынша тәжірибелі мамандар түсіндіру жұмыстарын жүргізді.
